LEGAZPI CITY – Puga-puga na an preparasyon kan mga opisyales kan Barangay 38-Gogon, Legazpi City sa nagdadangadang na 2025 Midterm Election.
Segun ki Kapitana Thess Naz sa intrevista kan Bombo Radyo Legazpi na nakaposte na an saindang mga barangay tanod kasabay an mga pulis sa Gogon central school kun sain nakabugtak an mga Automated Counting Machines na gagamiton kan nasabing barangay sa pirilian sa lunes.
Nagsasalitan suboot an mga tanod sa pagronda palibot sa bisinidad kan nasabing eskwelahan nganing masyerto an lugar partikulamente na pagbanggi.
Magtatarabangan man an saindang mga barangay personel asin mga manlain-laing law enforcement agency nganing magtaong asistensya sa mga botante enkaso may dae piglalaoman na mangyari sa Mayo 12.
Piglalaoman man kan nasabing opisyal an pagruso kan poco mas o menos 4,000 na mga rehistradong botante na mapasiring sa eskwelahan nganing magboto.
Sa nasabing bilang suboot an may kasabay na mga botante na hale sa kataraid nindang barangay siring na sana kan Barangay Cruzada kun kaya syerto siya sa pagruso kan publiko nganing gamiton an saindang karapatan na magboto.
Kamawotan niya na magboto an gabos asin pilion an mga kandidatong makakatabang para sa pagpapa-uswag kan ciudad kan Legazpi.
Pangapodan ni Kapitana Naz sa saindang nasasakupan na amayan an pagboto sa lunes partikular na an mga senior citizen, may kamatean, badus asin PWD nganing ma-aprobitsaran an early voting hours.
