LEGAZPI CITY- Pighahalat pa kan mga kapulisan sa Rapu-Rapu Albay an autopsy result kan sarong biktima na suboot nakuryente sa Brgy Buenavista sa nasabing banwaan.
Segun kay PMaj Briccio Cordova Jr. an Chief od Police kan Rapu- Rapu Municipal Police Station, tulos sindang nagresponde sa lugar kan pinangyarihan kan insidente makalihis na maghagad nin asistensya sa saindang hepatura an aki kan biktima.
Napag-araman na mantang nag check an biktima na nabistong si alyas Recardo na sarong barangay electrician sa poste kan kuryente sa nasabing Barangay kaiba an mga personahes kan Albay electric Cooperative an bigla na sana suboot ining nakuryente na kawsa kan saiyang tulos na pagkagadan.
Alagad dae man pighahale kan mga kapulisan an angulo na suboot inatake sa puso an biktima mantang nagiirahay sa itaas kan poste.
Mientrastanto, pig-asigurar kan Rapu-Rapu PNP na igwang maninimbag sa nasabing insidente kun mapatunayan na igwang foul play.
Panganpudan na sana kan hepe sa publiko lalo na sa mga electrician na siertuhon na warang nagdadaloy na kuryente sa mga linya kaini ngani na maibitaran an mga siring na kaparehong insidente.
