LEGAZPI CITY – Ideneklara komo grand winner an Barangay 57 Dapdap, Legazpi City sa implementasyon kan Outstanding Barangay Responsible Pet Ownership Ordinance 2025.
Segun ki Punong Barangay Glenn Barcelon sa intrevista kan Bombo Radyo Legazpi na dakula an saindang kugmahan huli ta sinda an ipigdesignar na grand winner kan Legazpi City Local Government Unit asin City Veterinary Office sa ibong kan 11 sindang naglaban-laban sa nasambitang honra.
Pagdoon niya na an pagpapa-otob nin ordinansa mapadapit sa responsableng pet-ownership nganing mabawasan an mga nagbabalagaw-bagaw na mga hayop sa mga kakalsadahan.
Sa mga paagi man suboot kan mga seminars na ipigkokondusir kan mga local na gobierno an nakakanood sinda na magin responsive asin functional sa pagpapadalagan kan saindang Barangay responsible dog owners enforcement team asin nararayo an mga kaakian sa huma na makagat kan mga nagbabalagaw-bagaw na hayop.
Pigtaram pa kan opisyal na an saindang stray dog elimination campaign na pigkokondusir kada bulan na kasabay sa saindang Barangay road clearing operation na mandato man kan DILG.
Padagos man an saindang information dissimenation sa saindang mga residentes nganing magkaigwa sinda nin kaaraman mapadapit sa importansya kan pagsuporta sa anti-rabies campaign.
Punto man niya na an pagpapasabot asin pagpapasunod sa saindang mga nasasakupan an kaipuhan gibuhon nin paluway luway nganing mas lalong masabutan ninda an importansya kan pigpapa-otob nindang mga inisyatibo asin programa.
Nagpasalamat man si Barcelon sa paggawad sainda kan nasambitang honra siring man sa suporta kan saindang konseho asin mga residentes para sa pagsuporta sa saindang programa.
