LEGAZPI CITY—Naguno kan Barangay Buyoan Legazpi City an manlaen-laeng honra sa ginibong Department of the Interior and Local Government D’Best Barangay Governance Awards 2026 sa Legazpi City.
Segun ki Kapitan Ronaldo Miña kan nasabing barangay sa intrevista kan Bombo Radyo Legazpi, naresibe ninda an honra para sa 2025 Best HAPAG Implementor, Seal of Good Local Governance for Barangays, Best Performing Barangay Secretary, asin paggradwar nin sarong barangay kagawad sa saiyang ikatulong termino.
Ini an patunay na nahihiling kan gobierno kun pano nagtatrabaho an mga barangay officials; dakula man ining tabang asin nagsisirbing motibasyon an pag-appreciar sainda nganing mas gampanan ninda an mandato sa saindang lugar.
Sinabi man kan opisyal na pig-aadalan niya an ibang mga lakdang nganing mamantinir kan barangay an siring na pagbisto.
Mientrastanto, pagiromdom man kaini sa mga residentes na magtinir na alertado urog nang nagpapadagos an pag-alburoto kan bulkang Mayon.
