LEGAZPI CITY – (Update) Balik na an suplay kan kuryente sa Brgy. Alcala, Daraga, Albay makalihis an nagin pag-oolay sa pagultanan kan mga opisyales kan barangay asin Albay Power and Energy Corporation (APEC) sa oficina kan Energy Regulatory Commission (ERC).
Lunes, alas-5:00 nin hapon kan mapailawan na an barangay.
Sa intrevista kan Bombo Radyo Legazpi ki Kapitan Cesar Mansos, nagpirma nin Memorandum of Agreement (MOA) an maginibong na lado.
Nakapalaman sa nasabing MOA an duwang bulan na transition asin rehabilitation period na isasagibo kan APEC.
An power firm an magkakaigwa nin individual reading sa kada harong sa laog kan duwang bulan mantang an barangay council man an maako kan bayad kan mga ini.
Makalihis man suboot an duwang bulan,direct connection na sa APEC an pagbayad kan mga consumidores.
Mientras tanto, babayadan man sa laog nin 18 bulan kan barangay an dapat i-settle na current asin arrears na nagkakantidad P9 million na nakadepende sa average consumption kan mga consumidores sa barangay.
Tinawang-duon kan opisyal na wara dapat na patong na porsyento sa babayadan urog na bako man an mga konsumidores an may sala sa nangyari.
Katakod kaini, pigmamawot man ni Kapitan Mansos na maaraman kun sain hali an computation na P2 million urog na nasa P7 million man sana an reading sa nakakaputan niyang mga resibo hali sa reading sa mother meter kan APEC.
