LEGAZPI CITY – Maogmang ipigheras kan City Veterinary Office kan Ligao na hahalion na an border control sa ciudad oras na maibalik na sa pink zone kan African Swine Fever.
Kasunod ini kan nairehistrong kaso kan African Swine Fever sa nasabing ciudad kan nakalihis na bulan.
Sa intrevista kan Bombo Radyo Legazpi ki Ligao City Veterinary Officer Dr. Azel Rañada, wara na nin nairehistrong kaso o nagpositibo sa nasabing virus sa lugar.
Ini an makalihis an isinagibong surveillance asin mass testing sa mga atamang orig hali sa mga barangay kan Ligao.
Nasa 100 na orig an kinuwaan nin blood sample kun sain anas man negative sa helang an nagluwas sa resulta.
Sa ibong kaini, nagpagirumdum man giraray an opisyal na magin maingat asin mahigot lalo na sa pagpapaluwas-laog kan mga tawo sa mga kulungan kan orig ngani na masiertong dae na malaogan kan Arfrican Swine Fever.
