LEGAZPI CITY- Labing kaogmahan an namamatean ngonian kan ama kan ciudad kan Legazpi makalihis na numbrahan an lugar bilang Most Competitive Component City in the Philippines.
Sa intrevista kan Bombo Radyo Legazpi ki Mayor Noel Rosal, dakulang honra na makaresibe kan nasabing award na magdadara man nin dakol na potential investors asin direksyon pasiring sa inapod kan opisyal na “trading map outside National Capital Region (NCR)”.
Kaibanan sa mga pighihiling ni Rosal na nakapa-angat kan ciudad an pagpatrabaho kan mga tinampo, drainage asin mga “improvement projects” siring man an paglaog kan call centers asin iba pang negosyo mantang aminado na kaipuhan pang dugangan an esfuersos sa mga pabrika.
Pigmimirar man kan alkalde na persepsyon kan kusog kan ekonomiya an pag-angat kan Legazpi matang puminangduwa na sana an dating nangengenot na Naga City na sinundan kan Tagum City.
Napag-araman na afuera sa pangengenot kan ciudad sa Competitiveness Index na piglalaomang masustenir hasta sa masunod na taon, nangenot man ini sa sektor kan Imprastraktura asin ikaduwa sa Economic Dynamism.
Isinagibo an 6th Regional Competitiveness Summit kasuodma sa Philippine International Convention Center (PICC).
