LEGAZPI CITY-Pignegaran ni Senador Bong Go na an isinangat na kaso ni Dating Senador Antonio Trillanes laban sa saiya asin parte suboot ini kan “diversionary tactics” para ilihis an atensyon kan publiko sa tunay na isyu kan korapsyon sa gobierno.
Sa pulong balitaan, sinabi kan senador na an dapat habulon an mga tunay na imbuelto sa katiwalian asin ghost projects sa irarom kan flood control program kan gobierno.
Salang tawo man suboot an pigpupuntirya ni Trillanes asin pigkwestyun niya man na nata dai kaini pigkakasuhan an mga totoong kurap.
Pigsierto man kan senador na dai suboot siya nagpapagamit sa anumang negosyo kan saiyang pamilya asin dai suboot niya ginamit an saiyang posisyon para paboran sinda.
Nangapudan man si Go sa mga ahensya kan gobierno, partikular na sa Independent Commission for Infrastructure (ICI), Ombudsman, asin Department of Public Works and Highways (DPWH), na tukuyon an katotoohnan asin magin patas orog na sa tunay na isyu sa gobierno asin sa maanomalyang flood control projects.
Magigirumduman na nagsunad nin kasong graft asin plunder si Trillanes laban ki Go asin dating Presidente Duterte sa Ombudsman katakod sa pagpabor suboot asin paglaog nin P7 bilyon na government infrastructure projects sa kumpanya na pagrugaring kan tugang asin ama ni Go.
