LEGAZPI CITY- Inasegurar kan sarong miembro kan Junta Provincial kan Albay na collective an magigin resulta kan isasagibong imbestigasyon katakod kan alegasyon kan korapsyon sa operasyon kan quarry sa provincia, asin bako sa kaisipan kan sarong tawo.
Sa intrevista kan Bombo Radyo Legazpi ki Board Member Pem Imperial, pighahalat pa kaya hasta sa presente an magigin desisyon sa paglaog kan National Bureau of Investigation (NBI) sa pagprobar sa alegasyon siring man sa pagtugot kan mga kaibanan sa konseho sa nasabing lakdang.
Nagkapira kaya sa mga bokal an naghayag na i-oktaba muna an desisyon para digdi tangarig na mapag-adalan an mga nagluwas na detalyes sa mga nakaaging pagdangog kan komitiba huli sa pagpalyar na mag-atendir.
Ipig-eksplikar pa ni BM Pem na magkasuway na isyu ang resolusyon na ipigbubusol asin nangyari kan committee hearing urog na binilog an enot na lakdang susog naman sa nagin privilege speech sa konseho kan nasabing opisyal.
Mientras tanto, tinawang-duon kan bokal na magigin trabaho na kan NBI an pagkua nin ebidensya na ma-substantiate sa mga reklamo mantang nagtutubod ini na dae sana mabase an dalagan kan imbestigasyon sa mga naihatag na sa komitiba.
