LEGAZPI CITY- Mahigot na nagpagirumdom an Department of Tourism sa publiko dapit sa mga nagruruluwasan na mga bogus travel agency katakod kan papaabot na summer.
Pag-eksplekar ni Bobby Gigantone, administrative officer kan DOT-Bicol, dakol an paagi ngani na maaraman kun an sarong travel agency an tunay o bako urog na sa presyo na pigtatangro kaini.
Segun digdi, posibleng iligalan sarong agency kun ‘too-good-to-be true’ an mga travel packages na makukua sa pinakabaratong kantidad.
Inako man kan opisyal na nadidifisilan an ahensya sa paghanap kan mga siring na klaseng travel operators urog na kun online transaction kaya maglalaag ini nin listahan kan mga accredited tour operators, travel agencies asin tour guides sa saindang Facebook page para na man sa kaaraman kan publiko.
Tinawan duon ni Gigantone an paglaban sa mga ini urog pang posibleng makaapektar ini sa turismo sa rehiyon siring man an kaugmahan kan mga turista na maabot sa sarong taon an pagpaplano kan saindang bakasyon mahiling sana an gayon kan Bicol na kaibanan sa Top 5 tourist destinations kan Pilipinas.
