LEGAZPI CITY — Nahahandal para sa seguridad kan pamilya an duwang board members sa probinsya kan Catanduanes makalihis na makaresibe nin death threat sa paagi nin text message.
Sa sarong intrevista, sinabi ni Bokal Giovanni Balmadrid na nagpuong maresibe kaini an mensahe makalihis na maipasar an resolusyon kun saen ini an primerong may-akda na obhetong ipa-relieve sa Korte Suprema sa posisyon an executive asin presiding Judge kan probinsya na si Hon. Lelu Contreras.
Enot nang pigpensar kan nasabing opisyal na nagpapagirumdom sana ini sa saiyang seguridad alagad kan masambitan na an dapit sa saiyang apat na saradit pang aki na may garong pagpatakot, nagdudad na an opisyal.
Mientrastanto, maski pa namamatean ni Bokal Arnel Turado an kakayanan kan nagpadara kan mensahe na magibo nin maraot, nagtutubod ining dae kayang gibuhon kan huwes an nasabing aksyon asin dakula suboot an respeto niya para digdi.
Sa huri, nanindugan an duwa sa saindang serbisyo sa publiko na dae suboot kayang ulangan nin anumang pananakot kun saen ipinagpasa-Diyos na sana an mga posibleng mangyari.
