Legazpi City- Pigbababntayan na kan mga kapulisan sa Sorsogon an saindang BMI o Body Mass Index katakod kan mandato ni PNP Chief Torre na dapat ay physically fit an lambang miyembro kan ahensya.
Segun sa intervista kan Bombo Radyo Legazpi kay PMaj. Arwin Destacamento, an tagapagtaram kan Sorsogon Police PRovincial Office na sa presente igwa nang mga tiggigibong lakdang an saindang ahensya para sa pagmamantinir kan lawas o BMI kan mga kapulisan sa probinsya.
Dae na man suboot bago sa saindang hanay an kaparehong direktiba na kun sain magigirumduman na igwa nang kaparehong mandato an mga nakalihis na PNP Chief. Na kung sain sa presente igwa ng mga inilatag na aktibidad an opisina para sa saindang mga personahes.
Nagkapira sa mga aktibidad an pagsasagibo nin Zumba, sports activities asin iba pang mga aktibidad kada martes.
Dugang pa kan opisyal na igwang inilatag na medikal team an Sorsogon PPO para mabantayan an timbang asin lawas kan mga pulis.
Segun pa digdi na dakula an importansya kan pagmamantinir kan pagiging physically fit kan mga personahes para sa maayos an salud asin maasigurar an agarang aksyon para sa mga pangangaipo kan kumunidad.
