LEGAZPI CITY — Kumpiyansa an ama kan sarong sa doseng finalist sa Bombo Music Festival 2019 na dakula an laban kan saiyang aki sa kompetisyon huli sa talento kaini.
Sa intrevista kan Bombo Radyo Legazpi ki Gerson Guantero, ama kan finalist na si Charmaine Garay na nagsurat kan kantang “Sabi mo sa Akin,” maikokunsiderar na suboot na achievement an pagkakalaog pa sana kan aki sa finals.
Amiando man ini na maski music teacher an aki, magabat man liwat an mga kalaban na makakahampang kaini sa Live Performance sa aga, aldaw nin Sabado sa Rose Memorial Auditorium, Central Phillipine University sa Iloilo City.
Napag-araman na an Bombo Music Festival an pinakadakulang music competion na pinartisiparan ni Garay makalihis manggana na nin tulong beses sa local competitions.
Pag-istorya pa ni Guantero na haros gabos na miyembro kan saindang pamilya an mga musicians asin na-develop an talento kan aki makalihis magin piyanista sa simbahan.
Antes mag-uli sa Pilipinas, si Guantero an nagtrabaho bilang mechanical engineer sa Saudi Arabia sa laog nin haros tulong dekada kaya haloy suboot ining nasuway sa saiyang agom asin tulong mga aki.
