LEGAZPI CITY- (Update) Bukas sa lado kan Bureau of Jail Management and Penology (BJMP) Bicol an masusing imbestigasyon sa pagkagadan kan saro sa mga residente kan Tabaco City District Jail kan nakaaging semana makalihis suboot na kulugan kan mga kapwa residente.
Binisto an biktimang si Marianito Abas, 46-anyos.
Sa intrevista kan Bombo Radyo Legazpi ki Jail S/Inspector Joseph Lucila kan BJMP Bicol, naghagad naman an opisina nin parallel investigation sa parte kan pulisya tangarig na mawara an anuman na duda asin espekulasyon.
Segun pa ki Lucila na maikokonsiderang premature pa an mga nagluluwas na pahayag urog na dae pa man ipigtatao an investigation report kan inapod kaining ‘unfortunate incident’.
Sa ibong kaini, tinawang-duon man kan opisyal na isolated case an nangyari.
Mientras tanto, ipinagsugo na an pagrelieve sa jail warden kan Tabaco City District Jail na ipinadara muna sa provincia kan Camarines Sur tangarig na dae makaapektar o makaimpluwensya sa nagpapadagos na imbestigasyon.
Pigtutukan man kan mga ini an posibleng lapses, kapabayaan o pag-abuso sa protocol kun saen inasegurar man kan opisyal na en kaso maprobaran, itatao man an magkakanigong disciplinary action na ipigtutulod kan mga proviciones kan ahensya.
