LEGAZPI CITY — Kinumpirmar ni PCI Arthur Gomez na nasa kustodiya na kan pulisya an bistong hold-upper sa syudad kan Legazpi.
Segun sa opisyal, positibo binisto kan mga testigo si Melvin Arias kun sain iyo man an suspek na dati nang nang-holdup asin nagpaputok sa sarong pulis.
Naarestar si Arias makalihis an pagbalo kuta kaining liwat na mang-biktima alagad nagpalyar huli ta igwang mga pulis na naglilibot sa syudad.
Nakatalaan na man ining sangatan nin kaso asin nangapudan an mga otoridad na kun igwang na-biktima nin holdup, magpasiring sana sa hepatura kan Legazpi City Police ngani na maaraman kun ini man an nakabiktima sa sainda asin kun desidido sindang sangatan nin kaso an suspek.
