LEGAZPI CITY-Ipigsangat ngonian na aldaw an mga reklamong ‘tax evasion’ an Bureau of Internal Revenue (BIR) kontra sa mga korporasyon na imbuelto sa mga iligal na transaksiyon.
Kung sain an personal pa na nagpasiring sa opisina kan Department of Justice si BIR Commissioner Romeo D. Lumagui Jr. ngani pormal na maisangat an mga reklamo.
Ipigsangat an 23 ‘tax evasion complaints’ laban sa 23 Corporations, 56 corporate officers asin 17 accountants.
Segun kay Commissioner Lumagui Jr, nadiskobre an mga ini mantang nagagamit nin mga ‘ghost receipts’ ngani matakasan an obligasyon na magbayad nin buwis.
Imbuelto an mga korporasyon asin indibidwal hale sa manlain-lain na industriya siring kan negosyong construction, manufacturing, food, electronics, entertainment, marketing retail asin iba pa.
Ipigheras man kan opisyal na nagabot sa 1.41-bilyon Piso an nawara o an tax deficiency sa Bureau of Internal Revenue sa koleksyon kan buwis huli sa nabistong transaksiyon.
Ipighayag man ni Commissioner Lumagui na an pagsasangat nin rerklamo, nagpapahiling nin seryosong aksiyon ngani malabanan an mga tax evaders sa nacion.
Malinaw man suboot na an mga sinangatan nin reklamo an imbuelto sa ‘tax evasion’ huli sa apektado kaini an dakulang ‘tax input’ ngani mapababa an obligasyong bayadan an mga buwis.
Magpopoon an mga reklamo sa pagbusisi kan DOJ ngani makumpirma an mga ini asin ngani maipadagos an kaso laban sa mga imbueltong korporasyon.
