LEGAZPI CITY-Nagsangat an Bureau of Internal Revenue (BIR) nin kasong kriminal sa Department of Justice (DOJ) laban sa Sunwest, Inc., kaiba an mga opisyales kaini na si President Aderma Angelie Descarga Alcazar asin Treasurer Cesar Zacarias Buenaventura huli sa suboot P22.71 bilyon na tax evasion poon 2019 hasta 2024.
An kompanya an dating pagsadiri suboot ni dating Rep. Zaldy Co.
Basado sa imbestigasyon kan BIR, sinadyang underdeclaration kan kita, salang pag-claim kan mga gastuson asin pagbakal, asn paggamit nin bako suportadong creditable withholding tax (CWT) credits an ginibo kan kumpanya sa saindang Income Tax Returns.
Bilang resulta, nakakua nin supisyenteng basehan an ahensya ngani kasuhan an Sunwest asin an mga opisyal kaini sa irarom kan Seksyon 254 asin 255 kan National Internal Revenue Code (NIRC).
An kaso may relasyon sa direktiba ni President Ferdinand Marcos Jr. na imbestigaran an mga iregularidad sa mga flood-control projects.
Nadiskubre kan National Investigation Division an dakulang pagkakaiba sa mga pagbayad na pig-report kan Department of Public Works and Highways (DPWH) kumpara sa deklarasyon kan kumpanya.
Kan Pebrero 2026, an BIR nagpaluwas nin Subpoena Duces Tecum sa Sunwest ngani iluwas an mga libro asin dokumento kaini, alagad dai ini lubos na nagsunod.
Imbes, ginamit kan BIR an Best Evidence Obtainable Rule asin kinumpirmar na igwa nin undeclared income na nagkakantidad nin P6.29 billion.
Afuera digdii, P36.63 bilyon na purchases asin P3.65 bilyon na expenses an dai pigbisto asin warang bastanteng dokumento, siring man an P291.12 milyon na CWT claims.
Sa kabilogan, uminabot sa P22.71 bilyon an kakulangan sa buwis kan kumpanya kabale an surcharge, interes, asin penalidad.
Segun ki BIR Commissioner Charlito Martin Mendoza, dae sinda maduwa-duwa na magsangat nin kaso kontra sa mga kumpanya na nagbabayolar kan ley.
An lakdang na ini parte kan Run After Tax Evaders (RATE) Program, na may katuyuhan na pakusugon an kampanya kontra sa tax evasion.
