LEGAZPI CITY-Naglansar an Bureau of Internal Revenue (BIR) nin sarong beses na programa sa pagbawas sa buwis na may katuyuhan na tabangan an mga micro business asin inactive taxpayers na makapag-settle kan saindang mga lumang obligasyon sa buwis na igwang bawas o libreng penalties.
Segun sa ahensya, sakop kan programa an mga micro taxpayers na igwang annual gross sales na maabot sa P3 million asin total na tax liabilities o penalidad na dai malampas sa P80,000 kada taxable year.
Kaipuhan sana na nag-iiral an mga kaso bago an Disyembre 31, 2025.
An mga kwalipikadong taxpayers, pwedeng mag-apply sa saindang kanya-kanyang Revenue District Office asin magbayad nin one-time abatement fee na P5,000 para sa kada aprobadong aplikasyon.
Enkaso nakumpleto na an mga rekisitos, tatawanan sinda nin Certificate of Availment.
Segun ki BIR Commissioner Charlito Martin Mendoza, obheto kan programa na matawan nin bagong pagpoon an mga saradit na taxpayer na may lumang obligasyon na i-update an saindang records asin magsunod sa mga regulasyon sa buwis.
Pinalawig kan ahensya an aplikasyon kaini sagkod Disyembre 31, 2026.
