LEGAZPI CITY- Pig-iingganyar ngunyan kan Bureau of Internal Revenue (BIR) an publiko na magbayad nin buwis antes an itinalaan na deadline sa Abril 17 ngunyan na taon.
Sa nagin mensahe ni BIR Client Support Service Assistant Commissioner Marilou Del Rosario sa isinagibong 2017 Regional Tax Campaign Kick-off, nangapodan ini sa mga taxpayers na dae na paghalaton an nasambitan na deadline huli ta pwedesir ining magkawsa nin data traffic sa online filing mantang road traffic sa manual filing.
Apwera digdi, nag-abiso man si Del Rosario sa mga mahuhudyan na magbayad nin tax na igwa nin 25% surcharge, 20% interest asin compromise para sa 1 aldaw na delay.
Pigrerekomendar man suboot ninda an paggamit kan saindang online services arog kan Electronic Filing and Payment System (EFPS) ngani na dae na personal pang magpasiring sa saindang opisina.
Ngunyan na 2017, ipigheras pa kan opisyal na nakatutok an ahensya sa streamline processes kun sain kabale an paglimita na sana sa lima sa mga rekisitos o dokumentong saindang pighahagad.
Kun igwa man suboot nin maghagad nin labi pa sa nasambitan na numero, pwedesir na isumbong sa saindang opisina o sa 8888 na emergency hotline kan gobyerno.
