LEGAZPI CITY — (Update) Salbado na suboot sa kagadanan an biktimang si Ryan Macinas makalihis na makuryente sa sarong subdibisyon sa Brgy. Sagpon banwaan kan Daraga.
Segun ki P/Supt. El Cid Roldan, hepe kan Daraga Municipal Police Station, nagtatrabaho si Macinas bilang construction worker ki Julio Hernandez Jr, sarong marine engineer kan aksidenteng maduktan kan saiyang likod an live wire.
Inabisuhan man suboot an biktima na may nakalaylay na wire sa ikatulong palapag kan harong alagad nalingawan suboot ini kan biktima.
Segun ki Roldan, aga nangyari an insidente kun kaya naidara tulos an biktima sa Bicol Regional Training and Teaching Hospital (BRTTH) kan mga personahes kan Bureau of Fire Protection (BFP) asin Health Emergency Medical Services (HEMS).
Base sa naging pagsusuri ni Dr. Owen de Guzman, triage officer, nagsapar si Macinas nin 3rd degree burn sa manlaen-laen na parte kan saiyang hawak.
Sa ngunyan, sinabi kan hepe na pig-aadalan na ninda an kasong posibleng maisangat laban sa tagsadiri kan harong mantang padagos pa an saindang imbestigasyon.
