Lalaoman na kan mga motorista an saro pang nakaambang paglangkaw nin presyo sa produkto kan petrolyo sa masunod na semana, (Enero 21, 2025) na pwedesir na magmarka kan ikatulong paglangkaw kan presyo kan gasolina asin iba pang produktong petrolyo para sa taong 2025.
Segun sa mga pagkakarkulo, basado sa international fuel trading sa nakalihis na apat na aldaw, maabot na sa P2.30 sagkod sa P2.50 an sipa sa kada litro kan Kerosene, P2.30 sagkod P2.60 naman an imamahal sa kada litro kan Diesel asin 1.35 sagkod P1.60 sa kada litro kan gasolina.
Sarong pangenot na dahilan sa nakakaapektar sa paghiro kan presyo kan krudo makalihis mag imposir nin sanctions an nasyon kan US asin UK kontra sa Russian oil.
Piglalaoman ining magdadara nin pagbaba sa mga export kan langis hale sa Russia, na magbubusol sa pagtaas kan presyo kan krudo sa bilog na kinaban mantang nagkakaigwa nin adjustment sa merkado huli sa pagluya kan supply hale sa saro sa pinakadakulang prodyuser kan langis sa kinaban.
Kan Enero 14, 2025, naglangkaw na an mga kompanya kan petrolyo nin P0.80 sa kada litro para sa gasolina asin kerosene, asin P0.90 sa kada litro para sa diesel. An mga paglangkaw na ini an ikaduwang round kan paglangkaw nin presyo ngunian na taon. Sa presente an kabilugan na pagtaas sa presyo kan gasolina asin kerosene an P1.80 sa kada litro, mantang P2.30 sa kada litro man sa diesel.
Mientrastanto, piglalaoman kan Department of Energy (DOE) na an mga kompanya kan petrolyo an mag-aanunsyar kan opisyal na mga pagbabago sa presyo tuyong Lunes, na ipapaimplementar sa masunod na aldaw.
