LEGAZPI CITY- Mas pinahewas pa an sakop kan pagpapabakal kan Bigas P29 ngani na mas dakol pa an mga namaanwaan na matabangan.
Segun ki National Irrigation Administration Bicol Director Engineer Gaudencio De Vera sa intrevista kan Bombo Radyo Legazpi na nakapag-ani pa nin paroy kan nakalihis na Setyembre hali sa contract farming kaya mas dakol pa an naipabakal.
Basado sa datos kan Setyembre nakapagpabakal nin nasa 5,000 bags na tig-sampulong kilo sa bilog na rehiyon.
Sa mga masunod na bulan man, target kan ahensya na darahon an programa sa mga lugar na nangangaipo nin mas baratong bagas.
Segun sa opisyal na positibo an pag-akseptar kan publiko sa nasabing programa na pigpapabakal sa mga Kadiwa Center huli ta dakula suboot an naitatabang ngani na makatipid an mga namamanwaan.
Marurumduman na kaibanan sa mga nakikinabang sa baratong bagas an single parent, senior citizens, persons with disabilities asin an mga miyembro kan Pantawid Pamilyang Pilipino Program.
Segun ki De Vera na sa masunod na mga bulan, pahewason pa an mga nasasakop kan contract farming ngani na mas mapadakol pa an ani nin paroy.
