LEGAZPI CITY – Ipigheras kan Bicolano topnotcher sa kakatapos pa sanang Master Electricians Licensure Examinations an saiyang pinag-agihan nganing maisakatupadan an saiyang pangaturugan.
Segun ki Domingo Cardano Cañeta Jr., an top 2 sa nasabing eksaminasyon sa intrevista kan Bombo Radyo Legazpi na labi an saiyang pasasalamat sa saiyang pamilya huli sa suporta na ipigtao saiya, sa kagurangnan para man sa paggiya saiya, asin sa mga kaklase niya sa review center na nagtukdo man saiya.
Inabot man siya nin tulong bulan sa pagre-review na nagin pahirapan para saiya huli ta kaipuhan niyang pagsabayon an pag-review asin pagtrabaho mantang dae man siya pinagbawalana na darahon an saiyang reviewer sa saiyang pigtatrabahuhan.
Naugma man suboot an company sa naguno niyang trayumpo asin dae pighuna na magigin saro siya sa mga topnotcher sa nasabing examination.
Pigtaram pa kan naunambitang topnotcher na bonus na sana saiya an pagigin top 2 huli ta mawot niya man sana an makapasar huli ta gabos na mga ka-trabaho an puro mga lisensyado.
Piglinaw niya man na dae muna siya nag-take kan exam kan pagraduate niya pirang taon na an nakaagi huli ta bako pa siya seryoso asin pig-enot muna an pagtrabaho.
Sa presente an gagamiton niya na an saiyang lisensya, nanudan asin eksperyensya sa saiyang pigta-trabahuhan bilang sarong electrician kan sarong kompanya sa Santo Tomas, Batangas.
Abiso ni Cañeta sa mga dae nakapasar sa mga Licensure Examination na dae mawaran nin pag-asa huli ta pwedesir pa sinda umulit asin adalan an mga bagay na pigkokonsidera nindang mapagal asin kaipuhan sana nin labing pag-igos nganing maguno an saindang pangaturugan.
