LEGAZPI CITY – Suportado kan grupo nin mga kababaihan sa Bicol Region an isinagibo kan grupong Piston na nationwide transport strike nganing kalampagon an padagos na pagtaas kan produktong petrolyo.
Segun kay Bicolana Gabriela Spokesperson Jen Nagrampa sa intrevista kan Bombo Radyo Legazpi na nagtutubod sindang bako sana transport sektor an apektado kan pagtaas kan produktong petrolyo kundi pati sindang mga ina na nagbu-budget kan saindang mga kakaipuhanon sa pang-urualdaw.
Patanid niya man na lalong mahigpit nin sinturon an mga ordinaryong Pilipino huli sa pagtaas sa presyo kan mga babarakalon na maresulta sa pagkagutom urog na an mga nagtitios kun kaya suportado ninda an pangapodan na tanggalon an excise tax asin value added tax.
Pigkokonsidera man niya na sarong bandaid solution sana an lakdang kan gobyerno na fuel subsidy huli ta dae man kaini haloy na makakasuporta sa presenteng problema kan transport sektor.
Pigdugang man kan opisyal na dae ninda pigsusuportaran an dagdag-pasahe alagad wara man sindang magiginibo urog nang kaipuhan man kan mga drivers asin operator nin ganansya nganing may mauuli sinda sa saindang mga pamilya.
Punto niya na bako dapat mga Pilipino an permihang nag-aadjust sa mga problema kan nacion kun responsibilidad suboot kan gobierno na pagaanon an buhay kan saindang nasasakupan kun kaya dae ninda mababasol an transport sektor na magkondusir nin transport strike.
Diretsahan niya man na sinabi na haloy nang namamatean kan gabos na mga Pilipino an pigsasagi kan gobierno na wara pang krisis na nangyayari sa nacion kawsa kan nagtitinding tensyon sa Middle East.
Pangapodan man ni Nagrampa na makisumaro sa pagkalampag sa gobierno nganing matawan nin solusyon an problemang nagpapahirap bako sana sa transport sektor kundi pati na man sa gabos na Pilipino arug na sana kan labing pagtaas sa presyo kan produktong petrolyo asin babarakalon.
