LEGAZPI CITY- Dakula an naging kaogmahan kan manhamiento kan Bicol University Bachelor of Science in Psychology makalihis sa naging resulta kan Psychometricians licensure examination kan nakalihis na August 2024 Board Licensure Examination for Psychometricians (BLEPP).
Kun babalikan, ipigpaluwas na kasuudma kan Professional Regulation Commission an resulta kan Psychometricians licensure examination kun saen nakua ni Thea Marie Orlina Sales gikan sa Bicol University (BU) – Daraga an ika-10 na pwesto sa August 2024 Board Licensure Examination for Psychometricians (BLEPP) na may 85.40 percent na ratin mantang nakua man kan enot na batch kan Bicol University (BU) – Daraga Bachelor of Science in Psychology an 100% passing rate para sa BLEPP 2024 makalihis na makapasar an 33 na exam takers.
Segun kay Atty. Alex Nepomuceno, Dean kan Bicol University Bachelor of Science in Psychology sa intrevista kan Bombo Radyo Legazpi pinukaw siya kan saiyang agom asin ibinareta an dapit sa naging resulta kan eksaminasyon.
Dakula an kaogmahan asin pasasalamat kaini sa Diyos huli ta sa ibong kan pagiging pioneer kan BS Psychology sa nasabing unibersidad asin uminagi pa an pandemya, nagibo man giraray na makapasar kan mga examinees.
Istorya pa kaini na nag- agi sa butas ng karayom an mga nakapasar huli sa dipisil suboot na makalaog sa nasabing kurso kun saen nakabase sinda sa entrance exam bako sa mga endorsement.
Dugang pa kan opisyal na pigpopromotir ninda an pagkakaigwa nin edukasyon na mau kalidad asin pagkakapantay-pantay.
Mientrastanto, nagpasalamat man ini sa gabos na nagtaong suporta sa Psychometricians maging sa mga opisina na nagtabang sa sainda sa nakalihis na mga practicum.
