LEGAZPI CITY – Padagos an paglangkaw kan numero kan teenage pregnancy sa enterong rehiyong Bicol base naman sa istatistikang ipinaluwas kan Commission on Population (POPCOM) Bicol.
Segun ki Jo Chua an planning officer kan nasambitan na ahensya, base sa pag-aadal kan Young Adult Fertility and Sexuality Study (YAFS), nasa 38% an proporsyon kan mga jovenes na nagbabasa nin pornographic materials kun saen an rehiyon man an nasa ikatulo sa may pinakahalangkaw na porysento digdi.
Segun sa opisyal, an pagbabasa kan mga siring na bagay an nakakadugang sa kuryusidad kan mga kaakian na maimbwelto sa pre-marital sex.
Apwera pa digdi, binasol man kan opisyal an teknolohiya huli sa nakakahiling naman an mga kababaihan nin x-rated movies asin sala suboot an pagtubod kan mga jovenes na may bulong para sa HIV/AIDS.
Naipahiling man sa pag-aadal na kan 2013, 13.7% kan mga babaye na may edad 15-19 anyos an nagpupuon nang magbados.
Kabanga suboot an idinugang kaini kumpara sa 6.2% kan 2002.
Bilang lakdang sa pagbawas kan nagdadakulang numero kaini, nagkakaigwa nin programa an ahensya sa irarom kan saindang adolescent health and development na sarong paagi ngane na maging responsable an mga jovenes sa pag-ataman sa sadiri.
Kaipuhan man suboot an pinakuso pang information dissemination asin segun pa ki Chua, kaipuhan na magtarabangan an gabos – pamilya, media, gobyerno asin public sectors ngani na mabawasan an numero kan teenage pregnancy sa rehiyon.
