LEGAZPI CITY – Preparado na an gabos na mga atleta na marepresentar kan Bicol region na magpasiring sa probinsya kan Antique para sa Palarong Pambansa 2017.
Sa intrevista kan Bombo Radyo Legazpi ki Kevin Arroco, Project Development officer II kan Department of Education (DepEd), pighayag kaini na mahali an deliogados kan rehiyon sa Abril 5 ngani na makapapuon na kan saindang practice sa venue kan nasambitan na sporting event.
Segun sa opisyal, nahihiling kan ahensya na saro ining magayon na istratehiya ngani na makabisado na an lugar ngani na dae na maalanganin sa pagkawat sa oras kan kompetisyon asin masiyerto an kapangganahan na maiuuli para sa rehiyon.
Makakatabang man suboot ini para sa mga atleta na magin komportable na sa mga playing venues urog na ngunyan na kadaklan sa mga ini an nagkaigwa nin repair.
Mientrastanto, pigsiyerto man ni Arroco na ‘well represented’ an gabos na mga kawat kaya kampante an mga ini na makakapag-uli nin bulawan na medalya an mga deligados kan rehiyon.
Pigsiyerto man kaini na maiba sa Antique an regional team ngani na ma-monitor an kondisyon kan mga aki urog na ngunyan na labi an init kan panahon alagad kampante man an opisyal na preparado an host region sa pagresponde sa anuman na pangangaipo kan mga atleta hali sa manlaen laen na parte kan nasyon.
