LEGAZPI CITY – Makalihis an haros 8 bulan kan implementasyon kan anti-illegal drug campaign na “Tokhang,” kabilugang 89 suspected pushers asin users an nagadan mantang 86,000 drug surrenderers an nairehsitro kan Bicol PNP.
Pahayag ini ni Chief Supt. Melvin Ramon Buenafe, PRO5 director, kasunod kan paglunsar kan multisectoral group Bicol Region Against Drug o BRAD sa Goa, Camarines Sur.
Segun ki Buenafe, an pag-establisyar kan BRAD an indikasyon na an mayorya kan mga Bicolano an nauuyam na sa problema sa iligal na droga asin pigsusuportaran an mahewas na kampanya kan gobyerno laban digdi.
Maski suboot nasuspendi an anti-drug campaign, mapadagos an BRAD sa saindang information dissemination asin awareness campaign kontra sa iligal na droga asin an pagkokondusir nin medical and dental services sa mga barangay.
Segun pa sa opisyal, kumpwesto an BRAD nin local government units (LGU) asin mga eskwelahan na nagsusuporta sa illegal drug campaign.
Ipigduon pa ni Buenafe na mawot nindang ipadagos an kampanya kasabay an diit na kadahasan asin mas eengganyaron an publiko sa tabang kan LGUs asin eskwelahan.
Parte suboot kan mga aktibidad kan BRAD an pagkokondusir nin youth camps kun saen an mga joven na nag-iimbwelto sa droga an magkakaigwa nin “worthwhile” na mga aktibidad ngane na mabago ninda an saindang mga perspektibo.
Matao man suboot an BRAD nin serye nin mga lectures dapit sa drug addiction ngane engganyaron an mga ini na ibitaran an iligal na droga.
