LEGAZPI CITY- Dae inintindi kan mga atleta sa Palarong Pambansa 2017 an labing init kan saldang sa isinagibong parada bilang parte kan pormal na pagbubukas kan Palarong Pambansa 2017 sa San Jose de Buenavista, Antique.
Sa intribista kan Bombo Radyo Legazpi ki Kevin Arroco, Public Development Office II kan Department of Education (DepEd) Bicol, makalihis suboot an parada, nagkaigwa nin demo sports na pinartisiparan kan manlaen-laen na rehiyon sa bilog na Pilipinas.
Presente an sekretaryo kan DepEd central office na si Leonor Briones asin iba pang opisyal gikan sa ibang ahensya de gobyerno.
SI Presidente Rodrigo Duterte man an nagserbing na huespe de honor.
Ipinahayag pa ni Arroco na antes pa man an opening, may mga advance games na arog kan foot ball sa elementary asin secondary level kun sain nanggana an Bicol region.
Sa elementarya, kalaban kan mga Bicolanong atleta an CARAGA mantang sa hayskul, kalaban an Central Visayas.
Iyo an first win kan Bicol sa taunang pakawat.
Sinabi ni Arroco na talagang ipinahiling kan mga atleta na dae sinda mapadaog urog pa na igwa sinda nin matibay na sports program digdi sa rehiyon.
Mientrastanto, kinukumpirmar pa an pagkakasungkit nin enot na bulawan kan Bicol sa kawat na shot put boys sa paagi kan atletang si Dominic Belga.
Kumpyansa si Arroco na makakaguno nin dakol na medalya an delegasyon na saiyang sinusuportaran asin magkakaigwa nin espasyo sa top spot makalihis na magtapos sana sa ika-onse na pwesto kan nakalihis na taon.
