LEGAZPI CITY- Kinalampag kan sarong kongresista hale sa Bicol an mga economic managers kan administrasyong Duterte sa magkakanigong aksyon makalihis na mangenot an rehiyon sa igwang pinakahalangkaw na inflation rate sa Pilipinas sa bulan kan Agosto sa 9%, susog sa datos kan Philippine Statistics Authority (PSA).
Ipighayag ni Ako Bicol Party-list Representative Alfredo Garbin Jr. sa intrevista kan Bombo Radyo Legazpi na tawanan nin decisive asin immediate action an problema na pighihiling na ugat an kakulangan sa suplay urog na sa bagas asin iba pang agricultural products.
Suportado ni Garbin a paramientras na pag-aangkat kan nagkapirang produkto sa ibang nacion na ipapabakal sa hibabang kantidad mantang ipigduon an pagdakop sa mga negosyanteng imbwelto sa pigsasabing hoarding kan mga produkto.
Kinontra man kan lehislador an mga kaibanan na nangangapodan na magdemitir na sa posisyon an mga economic managers asin sinabing aksyon muna an kaipuhan sa halangkaw na presyo kan bagas, gulay, sira asin karne.
Nagpatutsada pa an lehislador na bako anas publicity an atupagon siring na sana kan pagkaon kan pigsasabing “bukbok rice” sa hampang kan publiko na wara man suboot maitataong kongkretong solusyon.
Napag-araman na nalagpasan pa kan regional inflation sa Autonomous Region in Muslim Mindanao (ARMM), Soccsksargen, Western Visayas, Cagayan Valley, Davao Region, National Capital Region (NCR) asin Ilocos Region an 6.4% na national average kan inflation rate sa nacion.
