Inasegurar kan Bureau of Immigration an pagsangat nin kaso laban sa saindang mga personahes na napag-araman na iligal na nagtatabang sa mga foreign detainees.
Segun ki BI Commissioner Joel Anthony M. Viado, matinding padusa an kakahampangon kan sisay man na mapapatunayang imbuelto.
Ini an simbag kan opisyal makalihis an pagkakatanggal sa tulo sa mga personahes kaini na imbwelto sa pagtabang sa sarong prominenteng Russian vlogger na nakulong sa nasyon huli sa pag-harass sa nagkapirang mga Pinoy.
Naimbwelto an tulo makalihis na sabihon kan Russian national na tinabangan siya na magprodusir nin video content mantang siya an nasa bilanggoan.
Napag-araman na imbuelto an tulo sa iligal na paglaog kan sarong cellular phone sa BI Detention center.
Kasunod kan report, nagkondusir nin raid an mga personahes kan BI sa laog kan mga pasilidad sa Taguig City asin Muntinlupa City.
