LEGAZPI CITY — Preparado an Bureau of Fire Protection Regional Office 5 sa pagresponde sa mga insidente kan kasulo sa mga first class hotel asin iba pang mga darakulang establisyemento sa rehiyong Bicol tangarig na maibitaran an urog na dakulang problema siring kan nangyari sa Resorts World Manila attack na nagwalat nin 37 katawong gadan huli sa suffocation.
Sa pakikipag-olay kan Bombo Radyo Legazpi ki FC/Insp. Peter Paul Mendoza, regional fire operations officer, bilog na taon na suboot ining pighahandaan huli ta parte ini kan overall plan kan BFP.
Kasabay sa preparasyon na ini an pagtutok kan ahensya sa pag-comply kan mga establisyemento sa rekisitong fire safety inspection certificate na enot na pighahagad antes na matawanan nin business permit.
Sa paglilibot-libot kaya kan BFP, dakol na edifico an nadiskubreng wara kaini alagad huli sa reinforcement na ginibo sa pagresolber sa problema, ibinida ni Mendoza na harani na sa 100% an naisyuhan kan nasabing sertipikasyon.
Sa ibong na lado, dawa pa well-equipped an ahensya, tinawang-duon man giraray ni Mendoza an pangangaipo sa pagbilog kan fire brigade sa mga establisyemento na labi sa 50 an empleyado na urog na makakatabang sa pag-secure kan salbadong lugar.
