LEGAZPI CITY – Nagkondusir nin fire safety inspections an Legazpi City Bureau of Fire Protection sa mga polling precincts bilang preparasyon sa 2025 Midterm Election.
Segun ki Legazpi City Fire Station chief operation Senior Fire Officer 4 Garry Santander sa intrevista kan Bombo Radyo Legazpi na nakapag-inspeksyon na an saindang mga fire inspector sa mga nagkapirang eskwelahan na pigkokonsidera bilang mga major polling precincts.
Pighiling suboot kan mga inspector an mga wirings sa laog kan mga presinto, mga appliances kun naggagana pa asin an mga saksakan na kakabitan kan mga automated counting machines nganing mapalitan tulos.
Pigsabi pa kan opisyal na importante man an pagkakaigwa nin fire extinguisher sa mga polling precincts nganing tulos na matumpos an kalayo maski sadit pa sana ini.
Magkakaigwa man sinda nin deployment kan saindang mga personel sa gabos na polling precints nganing magtao nin asistensya sa mga dae pinaglalaoman na mga insidente sa aldaw nin pirilian.
Pangapodan ni Santander sa publiko na permihang mag-ingat, dae pagpabayaan an pigluluto, ilaag sa tamang laagan an mga kandila na pigagamit tuyong brownout asin icheck an mga electrical wirings nganing malikayang mabiktima kan kasulo.
