LEGAZPI CITY- Nangenot an mga tauhan kan Bureau of Fire Protection Guinobatan sa pagkuwa kan hawak kan sarong lalaki na pinagtutubudan na nahulog sa Travesia bridge.
Segun sa saro sa mga miyembro kan responding team na si Fire Officer 1 Jeorjhie Rempillo sa intrevista kan Bombo Radyo Legazpi na nakaresibe sinda nin apod dapit sa insidente kaya marikas man na nagkondusir nin technical assessment.
Aminado an opisyal na kumplikado an nagin proseso kan pagkuwa kan hawak kan biktima alagad nagin matrayumpo man liwat.
Kan makuwa an biktima, sinabi kan opisyal na wara na ining malay asin haros wara ng pulso kaya ipig-turn over sa Rural Health Unit kan Guinobatan.
Sa presente bako pa man malinaw kun papano nahulog an biktima sa nasabing tulay.
Katakod kan insidente, nagpagirumdom si Rempillo sa publiko na kun igwang mga pinag-aagihan an sarong persona asin kun igwang mga emerhensya, dae magduwa-duwang mag-apod sa saindang opisina.
