LEGAZPI CITY- Pigkokunsiderar kan Bureau of Fire Protection (BFP) Bicol na matrayumpo an clearing operations sa mga lokal na gobierno sa provincia kan Albay na naapektaran kan ashfall hali sa bulkang Mayon.
Napag-araman na nasa 35 fire trucks an nai-deploy sa mga banwaan kan Guinobatan asin Camalig.
Alagad segun ki BFP Bicol Director Fire Senior Supt. Achilles Santiago sa intrevista kan Bombo Radyo Legazpi na nagbalik na an mga fire trucks hali sa Camarines Sur asin Sorsogon, asin an BFP Albay na sana an natada na nagpi-penetrate sa mga barangay roads.
Sa ibong kan pagiging abala sa pagtabang sa mga apektado kan aktibidad kan Mayon volcano, sinierto kan opisyal na nagtetenir an kahandaan kan saindang pwersa na magin maagap sa pagrespunde sa anuman na insidente nin kasulo.
Paliwanag kaini na malalaoman kan publiko na dae nagpapabaya an ahensya sa anuman na emerhensya urog na kun magkakaigwa nin mga insidente nin kasulo.
