LEGAZPI CITY- Nangapudan nin suporta an Bureau of Fire Protection (BFP) Bicol na makapag install nin mas dakol na mga fire hydrants.
Segun ki BFP Bicol Acting Regional Director Fire Senior Superintendent Achilles Santiago sa intrevista kan Bombo Radyo Legazpi na sa presente, an mga water district sana o local concessionaire an pinagkukuhaan nin tubig kan mga fire trucks.
Sinabi kan opisyal na dapat na masabutan na wara ng mas importante pa sa panahon nin kasulo asin iba pang emerhensya kundi an tubig.
Paliwanag kaini na maski anong fire prevention pa an gibuhon kan ahensya, magiging difisil an sitwasyon kun wara nin mga fire hydrants.
Hagad kan opisyal na magin wake upcall sa mga local government officials an nangyayaring mga emerhensya ngani na masuportaran an ipigbubusol niyang lakdang.
Marurumduman kaya na sa Pilipinas, parte kan social responsibilidad kan mga local concessionaires an pag-install nin mga fire hydrants, alagad sa presente igwa na man na mga lokal na gobierno an nagpapakusog kan nasabing lakdang.
