LEGAZPI CITY- Ipinaliwanag kan Bureau of Fisheries and Aquatic Resources Bicol an nangyaring pagtatapok nin tamban sa Bulan, Sorsogon huli sa suboot oversupply.
Marurumduman na saro an banwaan kan Bulan sa may pinakadakulang dakop nin tamban sa bilog na rehiyon.
Basado sa datos, pigkakarkulong nasa 20,000 metric tons nin tamban an piga-unload kan mga municipal asin small scale vessel tuyong peak season.
Segun ki Bureau of Fisheries and Aquatic Resources Bicol spokesperson Rowena Briones sa intrevista kan Bombo Radyo Legazpi na nagkapirang cannery ang paramientras na nagpundo sa pagkuwa nin tamban huli sa kawaran nin bastanteng suplay kan yelo.
Ini an saro sa mga rason kaya dakol na mga dakop kan nasabing sira an nasayang asin itinapok na sana.
Paliwanag kan opisyal na tuyong bulan nin Marso hasta Hunyo an peak kan tamban sa banwaan kaya nagkakaigwa nin sobra-sobrang supply asin dae nakakasabay an produksyon kan yelo.
Huli digdi, target kan ahensya na mapakusog pa an produksyon kan yelo asin magkaigwa nin mas dakol na mga processing plant.
