LEGAZPI CITY-Padagos an pagbabarewas nin kaaraman sa publiko kan Bureau of Fisheries and Aquatic Resources (BFAR) Bicol mapadapit sa responsableng pamamahala kan coastal asin marine ecosystem kasabay kan saindang ika-63 na anibersayo.
Segun ki BFAR Bicol Spokesperson Wheng Bricia-Briones, sa intrevista kan Bombo Radyo Legazpi na sa saindang selebrasyon kan Fish Conservation Week, pigtatawan doon an importansya kan pag-ataman, pagpapabalik, asin an responsableng pamamahala kan coastal asin marine ecosystems.
Sa laog kan semanang ini, magkakaigwa nin manlain-lain na aktibidad an ahensya sa bilog na rehiyon.
Kabale digdi an opening celebration kun sain tatawan nin honra an mga katuwang kan BFAR sa pagpapaoton nin mga proyektong pangisdaan sa rehiyon.
Mapartisipar man sa nasabing aktibidad an mga empleyado kan ahensya.
Siring man kadakol pang mga aktibidades manungod sa kun papano maprotehiran asin mapreserba an mga aquatic resources.
Katuwang man ninda sa inisyatiba an iba pang national government agencies, partner academics, mga estuydante, fisherfolks, asin mga stakeholders para sa nasabing aktibidad.
