LEGAZPI CITY — Liwat na nagpatanid an Bureau of Fisheries and Aquatic Resources (BFAR) kan rehiyong Bicol sa permanenteng pagbabawal sa pagdakop, pagpabakal asin pagkaon kan sarong klase nin “Goby Fish” o Biya asin bisto man sa apod na “Mulog “ asin duwa pang klase nin “puffer fish” o butete.
An patanid kan ahensya an huli sa an mga sirang ini an kumpwesto nin makahudong na sangkap kaya dae dapat na kaunon.
An lason an pig-aapod na “Tetrodotoxin” na nakapagpabara sa mga ugat kan tawo asin wara pang bulong sa lasong ini.
Segun ki Nonie Enolva, tagapagtaram kan BFAR-Bicol, padagos an saindang kampanya dapit sa pagbabawal na kaunon an nasabing mga nakakalasong sira.
Mawot kan ahensya na libuton an mga pampublikong merkado ngane na i-check kun igwang pigbabakal na nasabing sira sa saindang pwesto.
Base man sa ipinaluwas na patanid kan BFAR dapit sa sintomas kan pagkalason sa sira an pamamanhid kan ngimot asin dila; pagkulog kan tulak; pagkaparalisa; kawaran nin koordinasyon kan hawak; pagpiot kan daghan; pagbaba kan blood pressure; pagkawara nin malay asin pagkaparalisa kan paghangos.
Katakod kaini, may padusa an madadakop sa pagdakop asin pagpabakal kan sira sa kandtidad na multa na P10,000 sa enot na offense; P50,000 2nd offense; P100,000 3rd offense asin 2 bulang pagkapreso; asin 4th offense P100,000 na may sarong taon na pagkapreso.
Sa irarom kan Fisheries Administrative Order No.249, series of 2014 kan BFAR, ipigbabawal an pagtinda asin pagbariwas nin puffer fish o Family Tetraodontidae.
