LEGAZPI CITY – Nagbarewas an Bureau of Fisheries and Aquatic Resources Bicol nin mga Typhoon ready Seaweed cages na nagkakantidad na ₱7.3 million sa provincia kan Albay.
Segun ki BFAR Bicol Spokesperson Rowena Briones sa intrevisa kan Bombo Radyo Legazpi na resipyente kan nasambitang proyekto an fisherfolk Association kan Barangay Galicia, Rapu-Rapu, Albay.
Parte suboot ini kan saindang paghihingoa na matabangan an mga seaweed farmer sa segundo distrito kan provincia.
Igwang 21 members sa naunambitang Barangay an na-identipikar bilang benipisyaryo sa irarom kan enhanced Philippine Seaweed Development program kan BFAR Central Office.
Pigheras man kan opisyal na kaya man tagalan kan mga ipigtao na cage an mga nangrarapado na mga bagyo sa provincia kan Albay.
Pigtawan man sinda nin capacity building training an mga farmers nganing mapakarahay pa an saindang kaaraman asin technique sa pagtatanom asin pagpapatalubo kaini.
Bilang saro sa mga rehiyon sa Pilipinas na pig-aagihan kan mga bagyo, napapanahon an siring kaining inisyatibo nganing makasabay man an mga paraooma sa paglikay sa epekto kan climate change.
Pagsyerto ni Briones sa gabos na mga fisherfolk Association sa rehiyon na maitatao an mga proyekto na para sa sainda kun kaya importante an kooperasyon kan gabos partikulamente an mga nasa barangay level asin iba pang stakeholders.
