LEGAZPI CITY — Ipig-eksplikar kan Naval Forces for Southern Luzon an mga benepisyo na mareresibe kan pamilya kan mga suldadong nagadan siring man an mga suldadong makakabalik na salbado en kaso matapos na an nagpapadagos na kariribukan sa ciudad kan Marawi.
Segun ki Capt. Franklin Escaliote, tagapagtaram kan NAVFORSOL, nakikipagkoordinar sinda sa higher command kun may mga incidence na imbwelto an mga hale sa area of responsibility ninda tangarig na asikasuhon an pagtatao nin asistensya sa mga iwinalat na pamilya kan mga ini.
Napag-araman na maabot sa hasta kabangang milyon an pwedesir na maresibe kan bereaved family.
Tipikal man suboot na an mga nasa training o katatapos pa sanang magtrain na yaon sa Manila an napu-pullout tangarig na ipadara sa lugar na may giyera huli ta fresh pa sa mga isip an napag-adalan sa kampo.
Sa pagbabalik kan mga ini, makakaresibe nin additional na combat incentive bonus na maabot sa 50% sa sweldo kada bulan.
Sa mga nagpahiling man nin kakaibang kapasidad sa giyera an pwedesir na makakua nin awards asin commendation o marekas na promotion.
Alagad sa ibong kaini, an pinakamagayon na makua kan mga suldado iyo an makauling salbado sa kada pamilya.
