LEGAZPI CITY – Kinuwestyon kan Bayan Bicol kun nata nagdeklarar pa nin ley martial si Presidente Rodrigo Duterte sa bilog na Mindanao sa ibong kan mga pahayag kan Armed Forces of the Philippines na kontrolado ninda an sitwasyon sa Marawi City.
Sa intrevista kan Bombo Radyo Legazpi ki Vince Casilihan, tagapagtaram kan nasambitan na grupo, kinakaipuhan na magin klaro an presidente sa nasambitan na deklarasyon asin dae dapat na idamay an bilog na Mindanao asin dae pagibuhon na rason an pagkakaigwa nin rebelyon.
Dugang pa kaini na makahandal an nasambitan na deklarasyon huli ta dakula an posibilidad na magkaigwa nanaman nin pagbalgar sa diretsos romanos.
Mientrastanto, pigduon man ni Casilihan na an nasambitan na isyu sa kariribukan an problema bako sana kan Muslim o Katoliko kundi laban kan bilog na Pilipinas kontra sa terorismo.
Pagbuyagyag pa kaini na an national independent policy an nagbubusol sa pag-aarmas kan nagkapirang grupo asin an gobyerno mismo an nagigin dalan ngani na mabilog an Abu Sayyaf na pigtataram na nagigin tandem na kan Maute group.
