LEGAZPI CITY — Tahasang inakusaran kan sarong lehislador si Chief Justice on leave Ma. Lourdes Sereno na mahiling mag-utik, mag-exaggerate asin gumibo nin istorya.
Sa eksklusibong intrevista kan Bombo Radyo Legazpi kay Ako Bicol Partylist Representative Rodel Batocabe, inako kaini na magin siya an kontra sa pagkakaigwa nin impeachment kan enot huli ta magdadara sana suboot ini nin debate asin kalibungan.
Alagad mientras na nagpapadagos suboot an hearing, saro siya sa mga nagboto nin ‘yes’ huli ta nahiling niyang igwang problema ki Sereno na napag-araman na dati man na propesor kan lehislador asin nakaibanan sa University of the Philippines.
Pag-eksplikar ni Batocabe, base sa mga kapot nindang ebidensya asin testimonya kan mga testigo, nadiskubre niyang dakol na mga kautikan an nagibo kan punong mahistrado.
Kaibanan na suboot digdi an pagsumiter kan Statement of Assets, Liabilities and Net Worth (SALN), pagpapaluwas na kinonsulta an ibang justices sa saiyang mga desisyon maski dae man kaini ginibo an konsultasyon asin dakol pang iba.
Dugang pa ni Batocabe kun sarong ordinaryong tawo an ma-exaggerate kan istorya, mapapatawad pa ini alagad warang katumbas an pag-utik kan sarong chief justcie na may pinakahalangkaw na posisyon sa pagtatao nin hustisya.
Marurumduman na sa Miyerkules, Marsi 14 ilalatag na an committee report dapit sa articles of impeachment asin pagdedebatihan sa plenaryo.
