Nagsunad nin panibagong mga reklamong kriminal asin administratibo an kampo kan pamilya Duterte laban sa haralangkaw na opisyal kan Marcos administration asin police officers sa Office of the Ombudsman ngonian na Lunes, Setyembre 15.
Ini an may kinaaraman sa pag-arestar sa saiyang ama na si dating Presidente Rodrigo Duterte sa Ninoy Aquino International Airport (NAIA) kan Marso 11 kan presenteng taon.
Sa 160 pages na affidavit complaint, inakusaran ni Davao City Acting Mayor Baste sinda Justice Secretary Jesus Crispin Remulla, DILG Sec. Jonvic Remulla, Department of National Defense Sec. Gilbert Teodoro, National Security Adviser Eduardo Ano asin iba pang mga opisyal nin kidnapping, arbitratry detention, grave misconduct asin iba pang mga pagbayolar sa ley.
Pinangaranan man komo respondent sa reklamo sinda dating Philippine National Police (PNP) Chief Gen. Rommel Francisco Marbil, former Criminal Investigation and Detection Group Director Maj. Gen. Nicolas Torre III, Prosecutor General Richard Anthony Fadullon, DOJ Undersecretary Nicholas Felix Ty, asin ibang pulis asin justice officials.
Nakasaad man sa reklamo na pag-abot kan dating presidente sa nacion hale Hong Kong kaiba an miyembro kan saiyang pamilya asin si dating Executive Secretary Salvador Medialdea an pwersahnag dinara sa Villamor Air Base, mahigpit na binantayan nin pirang oras, saka isinakay sa eroplano pasiring sa The Hague sa Netherlands nin warang due process.
Pinagkaitan man suboot an dating presidente nin marikas na access sa medical treatment sa ibong kan saiyang pigmamateng seryosong diabetic condition.
Nagkawsa suboot ini kay Acting Mayor Baste na ipagpadagos an kaso huli ta nagtetenir pa man an saiyang ama na nakakulong sa ibang nacion asin dae na kayang magsunad kan dating presidente nin mga kaso.
