LEGAZPI CITY – Dae makapanubod an sarong basketball player kan team Albay sa pagkakagana ninda nin bulawang medalya sa kakatapos pa sanang Palarong Bicol 2025.
Segun ki Jhon Carl Cerdiña sa intrevista kan Bombo Radyo Legazpi na sa edad niyang 12 anyos an nagin na siyang gold medalist sa nasambitang pakawat.
Nagin inspirasyon niya man an kagurangan, saiyang magurang asin an saiyang coach sa bilog na durasyon kan pakawat asin saindang trayumpo.
Pag-istorya kaini na bago siya mapabale sa elementary basketball team kan provincia kan Albay an nagsairarom muna siya sa tryout.
Pag-istorya pa kaini na nahilig siya sa pagkakawat nin basketball poon kan 9 years old pa sana siya asin poon kaito an pigmawot niya na magkawat sa mga haralangkaw na liga.
Sa paagi kan saindang trayumpo, sinda na man an irerepresenta kan kabikolan sa palarong pambansa na gigibuhon sa Ilocos Region.
Mapoon na man an saindang balik ensayo sa masunod na semana para sa preparasyon kan saindang team sa National meet.
Mensahe ni Jhon Carl sa mga arug niyang joven pa sana alagad nagmamawot na makabale sa mga prestihiyosong pakawat na gibuhon sana ninda an saindang mga pangarap asin dae magpundo hanggat dae ninda ini nakukuwa.
