LEGAZPI CITY—Timbog sa sarong operasyon an sarong barangay tanod makalihis na makuwaan nin pigtutubudang shabu sa Barangay Kinamaligan, Masbate City.
Binisto an suspek na si alyas “Nestor”, nasa legal na edad, lalaki, warang agom asin residente kan nasabing ciudad.
Nakumpiskar digdi an siyam na heat-sealed transparent plastic sachet na may laog nin pigtutubudang shabu na may gabat na haros 20 gramo asin market value na labi P136,000.
Ginibo an operasyon sa paagi kan pagpapaotob kan Search Warrant na inisyu kan RTC Branch 47, Masbate City sa kasong pagbalgar sa Section 11 kan Republic Act 9165 o Comprehensive Dangerous Drugs Act of 2002.
Basado sa report, kinundusir ini sa pinagsarong operatiba kan Masbate City Police Station, Maritime Police Station, Police Intelligence Unit/Provincial Drug Enforcement Unit,. asin Philippine Drug Enforcement Agency.
Sa ngunyan nasa kustodiya na ini kan Masbate CPS para sa tamang disposisyon.
