LEGAZPI CITY—Nilinaw kan sarong opisyal kan Barangay Padang, Legazpi City na kumpleto na an konstruksyon kan River Bank Protection Works and Drainage System sa Purok 3, Sitio Laom kan nasabing lugar.
Katakod ini kan enot nang naibareta kan Agosto 25 kun saen dae pa suboot nakumpleto an konstruksyon kan naunambitang flood control project sa nasambitang barangay.
Segun ki Barangay Padang Kapitan Harold Bembenuto, sa intrevista kan Bombo Radyo Legazpi, na tapos na an proyekto kan river bank protection works and drainage system sa Purok 3, Sitio Laom.
Pigsasaysay kan opisyal na an mga nakuanan nin impormasyon na mga laborer o construction workers na nagtatrabaho sa Purok 4 na wara sindang aram sa nasabing proyekto sa Purok 3, Sitio Laom, partikularmente an alegadong manlaen-laeng grupo an nagtatrabaho suboot sa pagkonstruir kaini huli ta bako ini residentes kan nasambitang barangay.
Dugang kan opisyal na aram man kan mga residentes na may ipigbugtak na flood control projects sa saindang barangay, alagad, kulang an kaaraman ninda sa detalyes siring kan project title asin projects IDs sa nasambitang lugar.
Sinabi pa ni Kap. Bembenuto na bako manlaen-laen an contractor sa nasabing river bank protection works asin drainage system sa Purok 3, Sitio Laom.
Tinawan-duon pa niya na kumpleto asin namo-monitor kan saindang barangay an mga proyekto sainda kaya nagin matrangkilo an pagkonstruir kan flood control project.
Abiso man kan kapitan sa mga residentes na yaon an saindang opisina nganing mag-monitor asin maasigurar na an mga proyektong pigkokonstruir an natatapos sa maray na kalidad.
Mientrastanto, an konstruksyon kan nasabing proyekto an saro sa mga listahan kan flood control projects na nasa Sumbong sa Pangulo website na may project description na “Construction of River Bank Protection Works and Drainage System along Purok 3 Sitio Laom, Barangay Padang, Legazpi City, Albay” asin may pondo na P96.4 milyon sa irarom kan contractor na Infra Builders And Sellers Philippines, siring man na may completion date na Setyembre 22, 2024.
