LEGAZPI CITY – Naka-andam na an konseho kan Barangay Mi-isi, Daraga, Albay sa posibleng epekto kan Tropical Storm “Ada” urog na kun magtrigger an mga dadarahon kaining pag-uuran nin lahar flow.
Segun ki Punong Barangay Nonito Alemania sa intrevista kan Bombo Radyo Legazpi na nag-abiso na sainda an Municipal Disaster Risk Reduction and Management Office para sa posibilidad nin pag-ebakwar.
Tatawan nindang prayoridad sa isasagibong evacuation an mga residente nindang gibo sa light materials an mga kaharongan enkaso magkusog na an mga pag-uuran sa mga masunod na oras.
Sa ibong kan pag-andam, nanindugan siyang mahalat sinda sa ibababang direktiba kan Lokal na Gobierno sa pagsasagibo nin prevention measure.
Pagdoon man kan opisyal na may nakahandang mga bulong an saindang Barangay para sa residente nindang makakamate na nin mga helang katakod kan warang patod na pag-uuran.
Pagirumdom niya sa saiyang kahimanwa na dae na magpasaway asin magsutil enkaso ipa-otob na an evacuation sa saindang lugar nganing malikayan an casualty.
