LEGAZPI CITY – Ipigbuyagyag kan kapitan kan Barangay Lapu-Lapu na nagkakaigwa sinda nin regular na paglilinig sa saindang mga drainage system ngani na mamantenir an kalinigan kan saindang lugar.
Segun ki Kapitan Gemma Espiritu, aldaw kan Domingo ninda pinagsasagibo an nasambitan na paglilinig kun sain pigpapartisiparan ini kan mga miyembro kan 4Ps asin mga opisyales kan barangay.
Mientrastanto, dugang pa kan opisyal, nagpapadagos man an iba pa nindang proyekto ngani na mas mapagayon an saindang lugar.
Katakod kaini, saro sa saindang mga plano iyo an pagbugtak nin dugang na mga solar street lights huli ta dae suboot kaya kan pondo kan barangay an pagbayad sa electric bill.
Segun ki Espiritu, obheto kaini na mas magin maliwanag an saiyang pinamamayuhan na barangay ngani na maibitaran an mga krimen urog na sa madidiklom na lugar.
Sa ibong na lado, inako man kan opisyal na igwang nagkapirang mga drug surrenderers na nagbalik giraray sa iligal na aktibidad makalihis an paramientras na pagkapundo kan Oplan Tokhang kun kaya naglalaom ini na mapupuho na an problema sa illegal drugs ngunyan na balik operasyon na naman an PNP.
