LEGAZPI CITY- Pangapodan kan sarong barangay kapitan sa syudad kan Legazpi sa saiyang mga constituentes na ipundo na an paggamit asin pagtulak nin iligal na droga.
Ini an kahagadan ni Joselito Martinez, kapitan kan Barangay San Roque.
Sigon digdi, diit na sana an mga durugista sa saiyang pinamamayuhan na pigkakarkulong maabot sa 1% o 1.5%
Sinabi kan opisyal na dakol na drug personalities an nadakop puon kan maglunsar an Philippine National Police (PNP) nin Oplan Tokhang.
Katakod kaini, inomaw ni Martinez an pulisya huli ta talagang nabawasan suboot an drug menace sa Barangay San Roque.
Dugang pa kaini, nagkaproblema kan magpundo an PNP sa mga operasyon kontra droga alagad nagtutubod sya na mapupuho an problema huli ta seryoso an PNP sa kampanyang inilunsar kan gobyerno.
Mientrastanto, ipighayag man kan nasambitan na kapitan na dakula an maitatabang kan Simbahan sa war on drugs sa pagbilog kan moral na aspeto kan mga drug suspects.
Sa ngunyan, saro pa sa pangapodan kaini sa mga imbwelto sa iligal na droga na ipundo na an iligal na aktibidad huli ta nakakaulang ini sa pagkakaigwa nin marangal na pagkabuhay.
